Literatura e imaxe: os nosos heroes de infancia

A banda deseñada, tamén coñecida co nome inglés de comic é un relato representado con debuxos e acompañado de bocadillos. Dentro da banda deseñada hai moitos xéneros, como o manga, a novela gráfica, o tebeo, as tiras cómicas, etc. A partir disto os alumnos e alumnas de primeiro e segundo de E.S.O. idearon un obradoiro sobre a banda deseñada e o álbum ilustrado.

Dentro deste obradoiro hai diferentes grupos:

Comecemos polo grupo do álbum ilustrado. O primeiro que fai este grupo é explicar que é un álbum ilustrado, que características ten, e os sentimentos que expresan as cores. Posteriormente ensinan materiais para ilustrar e déixannolos probar; ademais, a actividade contén un xogo no cal debemos debuxar algo a partir de frases aleatorias. A finalidade desta actividade é facer que descubramos máis alternativas literarias e coñezamos novas técnicas para debuxar.

  

Máis adiante temos o grupo de manga e anime, no cal nos explican primeiro que son o manga e o anime, as diferenzas que teñen entre si, o seu significado, como se le e os conceptos de liñas (efectos que se lle fan aos bocadillos nos mangas). Despois da explicación danlles a elixir entre catro actividades que consisten en:

1.- Ler un manga

2.- Xogar a “memory”

3.- Debuxo dun personaxe de manga

4.- Crebacabezas

O que pretenden conseguir os organizadores da actividade é que as nenas e os nenos descubran o manga.

      

Despois entrevistamos ao grupo de tiras cómicas: este grupo xurdiu grazas a que unha integrante quería facer algo relacionado con Snoopy, e investigando descubriron máis sobre as tiras cómicas e de alí crearon esta actividade de obradoiro. As tiras cómicas son historietas, publicadas en xornais, de entre tres e catro viñetas. Primeiro explícannos que é a tira cómica e fálannos de personaxes famosos como Snoopy, Mafalda ou Garfield. Máis tarde propóñennos actividades de puzzles de viñetas, diferenzas entre tiras cómicas, un xogo de memory, e mesmo debuxar a nosa propia tira cómica. O principal problema deste obradoiro é que aos nenos e nenas non se lles ocorre que facer, pero rapidamente os integrantes do grupo axúdanlles a crear a súa tira cómica inspirándoos con exemplos.

                                             

Outra parte desta actividade céntrase no cómic europeo (Tintín, Asterix, etc.) e o tebeo (Mortadelo e Filemón, Zipi e Zape, etc.). Primeiro explícannos de que tratan os cómics europeos e os tebeos, para posteriormente, facer as seguintes actividades:

-Colocar títulos ás portadas.

-Xogar a “Quen son?” con personaxes famosos de cómics.

- Relacionar personaxes cos seus nomes.

- Debuxar o noso personaxe favorito de cómic.

Ao final visitamos o grupo das franquicias de Marvel e DC: primeiro explícannos as dúas franquicias e as súas diferenzas, e despois propóñennos xogos como o de Memory con superheroes, facer un superheroe a partir de características aleatorias sacadas dunha caixa, identificar superheroes, ensinarnos a debuxar.