Hoxe en día as enerxías renovables son un tema moi popular
xa que cada vez son máis usadas, por iso este ano o obradoiro de enerxía
decidiu centrarse niso: está dirixido aos rapaces e rapazas de primeiro e
segundo de primaria e consta de cinco grupos os cales teñen en común a ensinanza
das diferentes enerxías.
O primeiro grupo que entrevistamos é o grupo de Alberto, Adriana
e Marta. Estes teñen dúas actividades, a actividade que levan a cabo Adriana e
Marta é facer un electroimán a partir dunha pila e un imán, o cal atrae cravos
para demostrar o electromagnetismo.
Por outra parte, está Alberto, que explica aos nenos e nenas
a enerxía eólica co seu mecanismo: este mecanismo consta dunha pila que activa
un ventilador, que simula o vento que fai xirar outra hélice, a cal acende unha
luz LED.
Mais adiante entrevistamos o grupo de Sebastián, Álvaro, Diego e Daniel, que se adican á montaxe de circuítos simples; entre os catro reparten os nenos e nenas, cos que teñen vinte minutos para realizar a actividade. A finalidade desta actividade é explicar os efectos da electricidade, os seus usos, e as cousas boas ou malas que ten. Xa que estes circuítos son moi entretidos e visuais para os nenos e nenas estes mantéñense moi atentos: "Con que acendas unha luz xa atenden”.
Despois destes está o grupo de enerxía solar, que pertence a
Rubén, Pablo, Guillermo e Enrique: o primeiro que lles ensinan aos nenos e
nenas é o concepto de enerxía solar, tema explicado por Enrique; posteriormente
Guille introdúcelles a actividade e ao final Rubén axuda a montar o
circuíto co panel solar, o cal activa un aparato que reproduce música. Este
obradoiro é moi fácil para os nenos e as nenas, polo cal estes prestan moita
atención, aínda que os principais problemas que hai son meteorolóxicos, xa que
non fai suficiente sol como para darlle enerxía ao panel solar.
Posteriormente entrevistamos o grupo de María, Darío, Ainara
e Germán, que mediante a montaxe duns coches a reacción, explican os distintos
tipos de enerxía, estes coches constan dun rectángulo de cartón, que se lles
montan unhas palliñas xunto cuns tapóns que funcionan de eixo e rodas; despois,
sobre o cartón, pégase un globo que impulsa o coche. Todo isto débese montar
entre cinco e dez minutos.
Ao final entrevistamos a Xurxo, Carlota e Sabela, que
explican a enerxía solar mediante globos: a súa actividade consta da
utilización dunha lupa e dous globos (un branco e outro negro), e grazas a que
o globo negro atrapa mellor a calor, estoupa antes. Primeiro explican que
é a enerxía solar e introducen a súa actividade, logo saen da clase e fan o
experimento cos globos ao aire libre.
“Eliximos esta actividade porque é divertida para os nenos e
as nenas, e aínda que o tempo non axude, podemos inventar novas
actividades”.
No hay comentarios:
Publicar un comentario