No século XX houbo moitos avances, por exemplo, na medicina,
na música, militares… Tamén houbo descubrimentos moi importantes como algúns
medios de transporte, ou en telecomunicacións. Por esa mesma razón aos rapaces
e rapazas de segundo de E.S.O. interesoulles este tema, e crearon o obradoiro
de historia, que trata completamente do Século XX, e estará dirixido aos nenos
e nenas de 5º e 6º de primaria.
O primeiro grupo que entrevistamos trata sobre os
transportes. Os dous rapaces encargados desa actividade establecen quendas para
explicar ao público, mediante carteis, os avances/inventos máis importantes no
transporte, para logo ensinar unha maqueta dun ascensor, que funciona cun
mecanismo de poleas. O que tratan de demostrar é a importancia destes avances e
a súa evolución. A pesar de que teñen pouco tempo para dar as explicacións, conseguen
captar a atención do público.
Posteriormente asistimos ao obradoiro de historia da música,
que trata de explicar os diferentes estilos de música e grupos que xurdiron no
século XX, aínda que máis ben se ensinan os estilos e grupos que xurdiron dende
a década de 1960 cara adiante. Despois da explicación fan un xogo no que
reproducen música e os nenos e nenas teñen que identificar de que estilo e
grupo se trata. Todo isto coa finalidade de facer que descubran novos estilos
de música, aínda que sexan de antes de teren nacido.
O terceiro grupo que entrevistamos trata sobre os avances na
medicina. Os tres membros reparten os temas: un encárgase de dar unha charla
sobre a xenética, outro sobre a cirurxía e o outro sobre a psicoloxía. En
conxunto explican a pirámide psicolóxica, o primeiro órgano amputado, a
invención do antibiótico etc. Despois xogan a o famoso xogo “memory” pero con
enfermidades e as súas curas.
Tamén entrevistamos o grupo que traballa a II Guerra
Mundial. Primeiro explícase a participación dos diferentes países nesta guerra
e as resistencias que xurdiron nese momento. Logo fanse dous xogos: nun
identifican os bandos de cada soldado, dependendo da súa facha e os datos que
lles dan na explicación, e no outro xogan a “Quen son?” cos diferentes
movementos de resistencia.
Outra actividade trata do armamento da II Guerra Mundial. Os
integrantes do grupo dividen os temas a explicar en infantería, avións e
tanques. Despois da explicación fan un xogo de identificar os temas explicados
con imaxes. O que intentan ensinar é como afectaron na II Guerra Mundial todas
estas cousas, e levalas aprendidas a casa.
Ao final está un grupo no que se explica brevemente a II
Guerra Mundial cun mapa político e as tres batallas máis importantes
desta guerra. Máis tarde fan un xogo de emparellar batallas con fotos e
algunhas preguntas sobre o explicado, co fin de saber máis sobre a II Guerra
Mundial e tomar consciencia de que algo parecido pode chegar a suceder. O
principal problema é a falta de espazo, pero a actividade é moi fluída e
entretida.
No hay comentarios:
Publicar un comentario