A meteoroloxía para todos

Quen non ten interese por saber o tempo que vai facer ao día seguinte? Poderei levar a minisaia ou terei que poñer a gabardina?

Neste obradoiro realizado por alumnos de 4º de E.S.O para nenos de 5º e 6º de primaria, e executado na clase de tecnoloxía, os nenos e nenas poderán descubrir os segredos máis ocultos da meteoroloxía.

Os encargados deste obradoiro dividíronse en 5 grupos de 3 ou 4 persoas. En cada grupo trátase un tema distinto co mesmo punto de partida (a meteoroloxía).

O primeiro equipo trata de amosar que o aire pesa, algo no que no noso día a día non adoitamos reparar. Para isto deseñaron unha maqueta feita con perchas e globos simulando unha balanza. Nun lado hai un globo con aire e no outro un sen aire. Co experimento descubrimos que o lado do globo cheo de aire se inclina máis que o outro, polo que queda demostrada a hipótese de partida.

 

No segundo equipo os ponentes ensinan ao público o que teñen que ver as precipitacións co clima, e as características dos diferentes patróns climáticos. Para isto idearon uns experimentos nos que empregan auga, colorante, un globo terráqueo e tubos de ensaio, todo isto co obxectivo de explicar a diferenza de precipitacións dun lugar a outro cun sinxelo experimento: con xeringas, enchen o tubo de ensaio dependendo do que chovera ou chova en cada lugar en mililitros.

 

Os integrantes do terceiro equipo ensínanlles aos máis cativos como funciona unha estación meteorolóxica, para que serve e as súas partes,  que é un papaventos e cal é a súa función

Para finalizar a actividade os nenos fan o seu propio papaventos caseiro feito con madeira, paus de madeira, palliñas e cartón.

Seguindo a nosa ruta polo obradoiro atopamos un equipo que conta cun mapa meteorolóxico no que a memoria é a principal ferramenta que precisaremos. Nel realízase un xogo no que teremos que lembrar localizacións anteriormente marcadas polas rapazas con símbolos de temática climatolóxica. Elixiron este tema porque lles parecía que o tema podía ser didáctico e entretido á vez.

Xa finalizando o percorrido, chegamos ao último equipo, cun xogo de mesa similar á oca con temática do polo norte e sur. Tras unha breve explicación, os nenos e nenas responderán preguntas sobre os polos para poder avanzar, e o primeiro en chegar ao fin do taboleiro gaña. Para elaborar o xogo empregaron papel, madeira e chinchetas. A súa elección baseouse na súa preocupación no cambio climático intentando así concienciar os nenos e nenas mediante un xogo que inclúe preguntas sobre o tema